Rdl. Phillip van der Merwe is Sondag (22/12) oorlede nadat hy lank kanker gehad het. Hy was sedert 2006 ’n toegewyde VF Plus-lid van Ngwathe se munisipale raad, wat Edenville, Heilbron, Koppies, Parys en Vredefort. Hy was een van die party se langsdienende raadslede.

“Sy morele kompas en standvastigheid het hom respek besorg, selfs onder ander politieke partye,” sê Jan van Niekerk, Vrystaatse partyleier. “Hy was ’n man van aksie en was altyd bereid om leiding te gee en self in te gryp waar nodig.”

Voordat hy tot raadslid verkies is, het Van der Merwe onder die ou bedeling jare lank as burgemeester van Heilbron gedien en ’n blywende bydra tot sy gemeenskap gelewer. “Sy regsagtergrond en leierskapervaring het hom ’n onmisbare steunpilaar gemaak vir sy gesin, gemeenskap en die VF Plus,” sê Van Niekerk.

Van der Merwe word oorleef deur sy vrou, Jeanne, en sy seuns, David, Pierre en Mark, met wie die party innige meegevoel betuig. “Mag hulle troos vind in die wete dat Phillip se nalatenskap sal voortleef in diegene wat hy aangeraak het,” sê Van der Merwe.

OFM Nuus mc