Local News
Plofstof in huiskerk gekry─── CHRISTAL-LIZE MULLER 11:12 Thu, 22 Mar 2018
’n Vrou wat glo ‘n kerkleier is, en haar seun van Theunissen, is agter tralies nadat plofstof in hul huis, wat ook as 'n kerk gebruik word, gevind is.
Polisiewoordvoerder in die Vrystaat, Thandi Mbambo, sê die eenheid vir openbare orde in Welkom het Maandag omstreeks 16:00 inligting ontvang dat mense in Theunissen in besit van plofstof is.
Volgens Mbambo het dié reaksiespan en lede van 'n provinsiale taakspan van 19:00 tot Dinsdagoggend 'n intelligensie-gedrewe operasie in Masilonyana uitgevoer.
Inligting is opgevolg en daar is Dinsdag in die vroeë oggendure op ‘n huis toegeslaan.
Dié huis is deursoek en “heelwat plofstof”, wat vermoedelik gebruik word om kitsbanke mee op te blaas, is in die huis gekry.
‘n Vrou (47) en haar 31-jarige seun is op die toneel op 'n klag van die onwettige besit van plofstof in hegtenis geneem.
Volgens Mbambo het dit later aan die lig gekom dat dié plofstof gebruik sou word om OTMs in Welkom op te blaas.
Hulle sal na verwagting môre in die plaaslike landdroshof verskyn.
OFM-nuus