Dit kom nadat 'n plaasbestuurder wreed vermoor en sy vrou aangerand is buite hul huis in die Ladybrand-gebied. Die DA se Leona Kleynhans sê dit is kommerwekkend dat die aanval op 'n plaas naby die Lesotho-grens plaasgevind het, waar veiligheidstrukture in plek behoort te wees.

Die 40-jarige Thankiso Pharoe en sy vrou is Maandagaand deur twee mans oorrompel toe hulle op die plaas Brandenburg tuisgekom het, waar hulle gebly en hy gewerk het. Hulle is met toue aan 'n draadheining vasgebind. Die aanvallers het geld, die egpaar se motor en bankkaarte geëis.

Pharoe en sy vrou is herhaaldelik met messe aangeval. Hy is op die toneel dood. Sy vrou kon wegkom om hulp te ontbied. Die aanvallers het met die egpaar se motor op die vlug geslaan, maar 'n ent van die plaas het hulle vermoedelik beheer daaroor verloor en dit het omgeslaan. Hulle het verder te voet gevlug. Niemand is nog in hegtenis geneem nie.

OFM-nuus