Polisiewoordvoerder, Fikiswa Matoti, sê 'n 44-jarige man is gister kort ná middernag by 'n huis in hegtenis geneem nadat speurders van die Parkweg-polisiekantoor inligting ontvang het oor 'n booswig wat met 'n huisbraak in die stad verbind word. Volgens haar het die voorval vermoedelik in Julie vanjaar plaasgevind toe die einaars van die huis uitstedig was. ‘n Klag van huisbraak is op 19 Julie by die polisie aanhangig gemaak.

Speurders van die Parkweg-polisiekantoor, a.o. Pieter Louw en sy kollega a.o. Frank du Plessis, het inligting ontvang en opgevolg oor ‘n man wat vermoedelik vir die inbraak verantwoordelik was.

Matoti sê die verdagte was met sy inhegtenisneming in besit van vyf kameras wat hy na bewering by 'n huis in Westdene, 'n woonbuurt in Bloemfontein, gebuit het. Die beweerde gesteelde kitaar, wat aan ‘n plaaslike pandjieswinkel verkoop is, was van die gesteelde goedere met ‘n waarde van altesaam R60 000.

Die vermeende dief sal na verwagting môre in die plaaslike landdroshof op aanklagte van huisbraak en die besit van gesteelde goedere verskyn.

Kliek hier vir meer OFM-nuus