Twee mense is Sondag (22/9) beseer en ’n koedoe is dood buite Barkly-Wes in die Noord-Kaap nadat hul bakkie in die koedoe vasgery het. Die dier is in die bakkie gevind nadat die dak van voor af oopgeskeur is.

Die Suid-Afrikaanse Polisiediens (SAPD) in Barkly-Wes ondersoek ’n saak van roekelose en nalatige bestuur ná die voorval, sê kol. Cherelle Ehlers, polisiewoordvoerder.

’n Toyota Hilux-bakkie het na bewering die koedoe sowat 10 km buite Barkly-Wes getref. “Met aankoms op die toneel het die polisie gevind dat beide die bestuurder en passasier reeds na ’n hospitaal in Kimberley vervoer is vir mediese behandeling,” sê Ehlers. Sy was nie bewus van die aard van hul beserings nie en die ondersoek duur voort.

Foto: Skermgreep

Road Safety gee wenke van wat mense kan doen as ’n dier voor ’n motor inspring:

• Indien moontlik, stop om die spoed en die impak te verminder.
• As ’n dier skielik op die pad verskyn, beweeg hulle dikwels in die rigting waarheen hulle voorheen op pad was. Probeer om te stuur na die rigting van waar die dier gekom het, wat kan help om dit weg te lei uit jou pad teen die tyd wat jy dit bereik.
• In plaas daarvan om op die dier te fokus, konsentreer op waarheen jy wil gaan. Dit sal jou help om meer effektief daar rond te navigeer.
• As ’n botsing onvermydelik is, probeer om die dier van die kant af te slaan eerder as van voor. Hierdie kan help om beserings aan beide die dier en skade aan jou voertuig te verminder.

Foto: Skermgreep

• As jy teen spoed van meer as 90 km/h ry, rem geleidelik. Hoë snelhede verhoog die potensiaal vir skade en besering tydens ’n botsing.
• Los die rem net voordat jy die dier tref. Hierdie aksie sal die voorkant van die voertuig lig en die kans verminder dat die dier jou voorruit tref.
• Trek ná die botsing op ’n veilige plek van die pad af. Dra helder kleure, skakel jou noodligte aan en merk die ongelukstoneel. Vermy om die dier te nader, aangesien dit beseer en moontlik gevaarlik kan wees.

OFM Nuus/Charne van der Merwe cg