Central SA
Driedubbele moord in Bloemfontein 'n sinnelose daad – VF Plus─── 14:37 Fri, 30 Jun 2023
Die driedubbele moord in Wilgehof, Bloemfontein, was 'n sinnelose daad, sê die VF Plus. Die party meen die misdaadskrisis in Mangaung het lank reeds handuit geruk en moet dringend aangespreek word.
“Een van die slagoffers, tannie Betsie Kruger, was 'n geliefde lid van die gemeenskap. Onder haar liefdevolle hand as dagsorgmoeder, is menige kleinding gevorm. Ouers wie se kinders in haar dagsorgsentrum was, is swaar getref deur die nuus,” sê Valerie de Kock, VF Plus-raadslid in die Mangaung-metroraad.
“Die VF Plus verwelkom die feit dat die bevel- en beheerstruktuur van die polisiediens spoedig op die toneel was en alle toepaslike nooddienste spoedig ontbied is. Die honde-eenheid, forensiese eenheid en buurtwag was ook vinnig op die toneel.”
Naburige inwoners en ondernemings het hul eie sekuriteitsbeeldmateriaal aan die polisie beskikbaar gestel om met die ondersoek te help.
Die VF Plus doen opnuut ’n beroep op die gemeenskappe om betrokke te raak by hul plaaslike veiligheidstrukture, om hulself en hul eiendom so goed as moontlik te beveilig en om ten alle tye paraat te wees.
“Die VF Plus spreek hiermee sy opregte medelye uit met die slagoffers se naasbestaandes.”
OFM Nuus/Mediaverklaring
