Central SA
Kimberley: 4 munisipale werkers beseer toe substasie ontplof─── KEKELETSO MOSEBETSI 13:47 Mon, 13 May 2024
“Die beseerde werkers is vinnig na die hospitaal vervoer vir dringende mediese aandag”
Vier munisipale werkers van die Sol Plaatje-munisipaliteit is in die hospitaal opgeneem ná ’n ontploffing Maandagoggend (13/5) by ’n substasie in Kimberley.
“Die ontploffing het omstreeks 09:00 by die substasie in Herculesstraat gebeur toe die elektrisiëns aandag gegee het aan ’n kabelfout,” sê Thabo Mothibi, munisipale woordvoerder.
Vier munisipale werkers is beseer in ’n ontploffing by die substasie in Kimberley. Foto: Sol Plaatje-munisipaliteit
Daar is vinnig opgetree om die beseerde werkers na die hospitaal te neem. Dit is nog nie bekend hoe ernstig hul beserings is nie. Inwoners kan kragonderbrekings verwag weens die ontploffing.
Mothibi sê die Departement van Arbeid moet eers ’n deeglike assessering doen voordat die substasie veilig verklaar kan word en die herstelwerk kan begin. Hy sê dit is noodsaaklik dat lesse geleer word en maatreëls getref word om soortgelyke voorvalle in die toekoms te voorkom.
OFM Nuus/Kekeletso Mosebetsi dg/mvh
